我還不想讓位

........
聽講最近新高中三三四出咗考試題目，某傳媒機構請咗白韻琹作答中文試卷，但連白姐姐都唔識得作答，中文科權威考官喺唔知係邊個作答嘅情況下批改試卷，毫不留情咁肥佬咗佢份卷。另外，通識科題目有條問關於香港政黨同政治情況，聽講艱深程度拍得上大學試題，阿mum慨嘆連才女與及大學生都唔識得答嘅考題，咁叫準考生點面對？阿sir就分析話，咁係因為要分辨出5同5星星級嘅分別，(由1至5星星共有7級，代替以前會考A至unclassified)搵出真正出類拔萃嘅學生，其實一般大學對通識科嘅入學條件要求係2或者3，雖然係咁，無論如何，班考生都會感到具大無比嘅壓力，阿Jack同Gigi嘅表哥Tony就係最好嘅例子。甚至因為考試壓力而患上過敏性皮炎──濕疹。
Tony係明年新高中考生，佢讀緊一間直資中學，可以選擇考國際文憑試IB課程，應考外國大學，本來以為咁樣會冇咁大壓力，但係原來讀IB課程係唔可以hea，通常都係學術精英先至報讀，而佢間學校仲為咗保障，一定要佢哋報讀埋新高中課程，結果補習、失眠、冇胃口、發惡夢持續，由舊年暑假開始，就開始患上濕疹，成八、九個月都未好番，全身痕癢紅腫，睇極醫生都醫唔好，醫生話好大可能係因為壓力造成。最後，佢屋企人投降，決定送佢去英國讀書，話都冇咁神奇，Tony臨去英國前，啲皮膚病濕疹慢慢好番晒。好彩阿Jack同Gigi仲細，未使受呢種壓力同折磨。
講起皮膚病，令我阿Fay諗起我哋菲律賓有一個關於特異功能醫好皮膚病嘅有趣流言。故事係同一位名為媽眉(Mameng)的老婦人有關，媽眉係七、八十年代最有名嘅白巫師，曾經為馬可斯夫人伊美黛治療醫師束手無策嘅皮膚怪病。媽眉診斷第一夫人嘅病係遭到雄性人魚詛咒有關，因為呢啲人魚喺興建連接薩馬島同雷伊泰島之間嘅聖法尼克橋時受到傷害，媽眉建議伊美黛同人魚和解，並且喺為伊美黛而建造嘅love bridge橋墩舉行和解儀式，之後伊美黛嘅皮膚怪病就好番晒，媽眉亦因此受到重賞。阿sir同阿mum聽咗當然唔信，認為唔係乜嘢特異功能，只係迷信，一直好唔捨得表哥走嘅阿Jack就話，Tony表哥一定係俾考試詛咒而有皮膚病，如果可以早啲幫Tony表哥舉行和解儀式，咁就唔使掉低佢一個人去英國讀書，大家聽完之後捧腹大笑！但諗真一下，阿Jack嘅童言無忌，其實都講得幾有哲理